Klandestin jew Fej' żbokk?

Il-Komiks tas-Sikkina kienu u għadhom intenzjonati għal qarrejja partikulari. Bil-pubblikazzjoni tal-istrixxikli tagħna fuq Facebook qed nittamaw li tiżdiet il-faċilità li naslu għand aktar nies imma l-iktar għand dawk li jaħsbu xi ftit differenti mill-kotra u dawk li f'għeruqhom jew fit-trobbija tagħhom għandhom għal qalbhom il-wirt kulturali Malti. Dawn in-nies x'aktarx li huma artisti u innovativi jew inkella nies intelliġenti li kapaċi bl-influenza tagħhom jgħinu sabiex dan il-wirt ma jintilifx.

Ħafna minnkom li qraw l-istrixxikli tal-Gawgaw u L-Imlejka u tal-Kranium kif ukoll ta' Piju s-Surġent, jafu li m'aħniex nippruvaw ngħallmu jew ngħaddu xi messaġġ. Dawn il-komiks huma biss għal gost u għal mogħdija ta' żmien u hekk irriduhom jibqgħu: bħal ma' kienu l-ħrejjef ta' missirijietna dari; anki jekk ħaduhom fl-università u tefgħuhom taħt il-mikroskopju u analizzawhom bir-reqqa u ppruvaw jagħsru minnhom xi tifsira, allegorija jew xi simboliżmu.

Il-Komiks tas-Sikkina kienu maħsuba biex jgħaddu minn id għal oħra, minn taħt it-taħt, kisnijiet, mhux daqstant fil-beraħ sabiex l-artisti li jiktbuhom u jpenġuhom ma jkollhomx ix-xkiel taċ-ċensura soċjali, għajr dik imposta fuqhom stess minnhom stess. Il-materjal tal-istejjer huwa għall-kbar iżda ma joffendi l-ħadd. Imma mhux kulħadd jista' jieħu pjaċir bih. Dan għaddejna minnu meta l-istrixxikli tagħna ma tħallewx jinbigħu minn ċerti postijiet minħabba l-kontenut tiegħu. Dak li ktibna u pinġejna u li għad irridu niktbu u npinġu għandu jkun ippublikat b'mod ħieles imma klandestin, kif xtaqnih sa mill-bidu: għal dawk li japprezzawh u jixtiquh.

It-tixrid u t-tqassim tal-materjal tal-komiks tas-Sikkina fuq facebook jista' jitfagħlna dawl ġdid fuq kif il-pubbliku  jaċċetta u jittollera n-nudiżmu u l-erotika u anki l-involviment tal-karattri bħax-xjaten u l-allat mitoloġiċi bħala divertiment. Minn din it-triq taħt l-art li s'issa terraqna, ma nafux eżatt mnejn se niżbokkaw u x'se jiġri mill-Komiks tas-Sikkina.
Iż-żmien jagħtina parir.