Il-Malta Comic Con 2011 - għaddiet ukoll.

Bħall-attivitajiet l-oħrajn li kellna din is-sena, l-Earth Garden u l-Lejl Imdawwal (Notte Bianca), il-Malta Comic Con waslet ukoll fi tmiemha illum. Dawn nistghu ngħidu li huma l-uniċi opportunitajiet li jipprovdulna lok fejn niltaqgħu magħkom il-qarrejja u dan nieħdu gost nagħmluh u nistennew bil-ħerqa għad-drabi li jmiss, x'aktarx is-sena d-dieħla. Intom li sirtu tafuna għall-ewwel darba u qed tħufu fis-sit tagħna u f'dan il-blogg, nagħtukom merħba filwaqt li nistednukom tkomplu ssegwuna fil-ġimgħat li ġejjin għal xi ħarġiet ġodda tal-Komiks tas-Sikkina.

Il-festival tal-komik din is-sena kien, fl-opinjoni tagħna, suċċess, mimli b'attivitajiet interessanti u artisti talentati u attendenza sabiħa tal-pubbliku. Nirringrazzjaw lill-organizzaturi, il-Wicked Comics u nifirħulhom għal dan is-suċċess. Ħadna gost naraw pubblikzzjonijiet ġodda minn artisti lokali. Nittamaw li dan ir-rittmu jkompli għaddej fis-snin li ġejjin. Prosit lil kulħadd.

Dawn huma l-pubblikazzjonijiet li rajna u li akkwistajna aħna fl-edizzjoni ta' din is-sena:

For Galantry Issue 0 u #1 ta' Fabio Giangolini

Arcana Crusade 1 - Bernard Micallef

Ħal Mudlam Issue 2 - Joseph Bugeja

Apocalypse Rocked Part 1- Dean Fenech

Pilot -Comic Anthology

Piju s-Surġent - Bin Għisa u Dell (Robert Micallef)

Piju s-Surġent fil-Malta Comic Con 2011

Piju s-Surġent huwa wieħed mill-karattri l-ġodda tal-Komiks tas-Sikkina. Maħluq minn Bin Għisa u mpinġi minn Dell (Robert Zammit), dan il-karattru l-ġdid ikompli jintroduċina mal-kwien tas-seħer bħalma huma d-dragi, tas-setta, s-sħaħar, ix-xjafek u l-kitbiebes. Piju s-Surġent huwa aġent speċjali tal-Qamar, u mibgħut mill-Ħares biex ikisser li dawn li jġibu l-kaos u d-diżordni. Għax Piju ma jaħmilx 'l min jagħmel il-ħsara. B'dirgħajh felħana jeħodha mal-bhejjem feroċi u l-uħux li joħorġu fis-satra tal-lejl.

Piju s-Surġent deher għall-ewwel darba s-sena l-oħra fi strixxiklu speċjali tal-Comic Con. Din is-sena se jkompli fejn ħalla l-aħħar darba biex jiġġieled għalina ċ-ċittadini u 'l dawk li mhumiex magħna se jifqagħhom, jgħattanhom u jġibhom fix-xejn.

Piju s-Surġent huwa strixxiklu wieħed waħdu, jiġifieri storja bla rabta ma' xi sensiela oħra. Jinkludi fih l-istorja tas-sena l-oħra u se jkun għall-bejgħ fil-Comic Con ta' din is-sena fil-Kavallier ta' San Ġakbu, il-Belt, fis-26 u s-27 ta' Novembru 2011.

Malta Comic Con 2011

Il-festival annwali tal-komiks f'Malta se jsir fis-26 u s-27 ta' Novembru 2011 fil-kavallier ta' San Ġakbu, il-Belt. Se jkun hemm ħafna attivitajiet differenti inklużi films, taħdidiet, wirjiet ta' artisti lokali u barranin eċċ. Aħna tal-komiks tas-sikkkina se nkunu hemm bl-aħħar strixxikli tagħna. Tilifux dan l-avveniment tas-sena intom kollha dilettanti tar-rakkont impenġi. Segwu l-aħħar aħbarijiet u żviluppi fis-sit uffiċċjali tal-Malta Comic Con hawnhekk.

Ħabib fis-suq tal-Lejl Imdawwal

Liam kien qed ipejjep sigarett fuq il-bejt. Kien qed jipprova jfittex lehma għax ried jikteb fuq il-blogg tiegħu l-aħħar silta minn sensiela ta' stejjer straordinarji. Ix-xemx kienet ilha xi sagħtejn li niżlet u ntfiet fil-baħar tal-punent. Kien waħdu. Is-Sibt filgħaxija sulu sulu. Sa ftit ilu kellu lil Nadine tispirah bi fweħitha, bil-benna ta' xoftejha u ... sa... ftit ilu... Imma issa telqet. Ħallietu. Nifs ieħor mis-sigarett. Is-sema dlam u taħtu twieqi bid-dwal baxxi mixgħula wara purtieri mġerrija. Ftit lil hinn, id-djar u l-palazzi tal-Belt, issa nxtgħelu u bozoz u fanali qawwija rmew baħar ta' dawl li bajjad saħansitra s-sħab li kien għaddej fil-baxx.

Dak x'inhu dak id-dawl? Staqsa bejnu u bejn ruħu.

Illum il-Lejl Imdawwal - wieġeb leħen li ma jafx jekk semgħux tassew jew jekk tlissenx ġewwa rasu.

Niżel isfel u ħareġ mid-dar u telaq jimxi fit-toroq u l-imsieraħ. Kien hemm in-nies. Kulħadd miexi 'l hemm u 'l hawn. Xi uħud libsin pulit, ħiemda għaddejjin dritti jħarsu lejn xi fuljett f'idejhom bħal donnhom qed jagħmlu t-talb tas-seba' visti. Oħrajn ipaċpċu fuq l-imwejjed tal-kafejiet. Kien jidher ċar li kien hemm xi avveniment mhux tas-soltu fit-toroq tal-Belt.

Fejn se naqbad immur? - staqsa lilu nnifsu Liam - Forsi nsib xi lehma.

Ħallini nkunlek ta' raħħab u ndawwrek jien - qallu raġel fih mogħl' hawn, wiċċu bajdani, bla xagħar u bi tbissima li tiġbdek.

Int Liam hux veru? - reġa' staqsa r-raġel liebes libsa intiera bajda silġ bil-qmis sewda u ingravata bajda ukoll.

Iva hekk hu - wieġbu Liam. - U int...?

Jien jisimni Jurik... il-Qamar - wieġbu r-raġel bi tbissima waħda.

Il-leħen ta' dan ir-raġel issa beda jxebbhu ma' dak li sema' ftit ilu jew stħajjel li semgħu jidwi f'rasu. U issa kkonferma dan ix-xebh x'ħin dan Jurik "il-Qamar" tenna : Illum il-Lejl Imdawwal u se ndawwrek jien mat-toroq tal-Belt. Għidli x'tixtieq tara.

U Liam qallu: Irrid nisma' ilħna mielsa li jwensuni. Irrid inxomm fwejjaħ li jiftħu l-moħħ. Irrid induq il-ħlewwa tal-mużika ħelliesa... Irrid insib lehma li tnebbahni... li ddawwalni minn ġewwa.

U Jurik "il-Qamar" ħadu f'teatri u fil-pjazez fejn tbaħbaħ fil-għoġba tal-miġemgħa. Ħadu jisma' daqq li jpaxxi l-widnejn u wrieh xbihat li jbirru l-għajnejn. Sqieh xorb li jnessi u li jfakkar. U temgħu ikel li jaħjih.

Imma Liam baqa' ma sabx il-lehma. U minħabba f'dan sewwed qalbu.

Jurik "il-Qamar" ħabat se jaqta' qalbu minn Liam imma mbagħad ftakar f'post wieħed li ma wriehx u qallu: Naf ħabib fis-suq li jista' jgħinek.

U ġibdu għas-suq tal-Belt, lejn mejda żgħira. Kien hemm raġel b'leħja pulita li kien qed ibigħ kotba rqaq bl-istampi. U bejn il-kotba u l-folji tal-istampi feġġet bħal tieqa li minnha bdiet ġejja żiffa ċċafċaf ħelu ħelu ma' wiċċ Liam u ttajjarlu l-beżbużiet ta' xagħru. U sema' leħen sbejjaħ isejjaħlu u ttawwal għal ġot-tieqa u ra dinja oħra. Ra tfajla samranija b'xuxitha ttir mar-riħ, riesqa lejh, tistiednu, tkellmu kliem li jmiss il-qalb. It-tieqa saret bieb u daħal ġewwa u mar mat-tfajla samranija u daq fommha, issaħħan ma' laħamha tari u twaħħad magħha u ħsiebu xegħel.

Jien Liam - stqarrilha.

U hi weġbitu - Jien Lehma.



Is-Sibt l-1el t'Ottubru 2011 fis-suq tal-Belt.

It-3et strixxiklu tal-Kranium

Mis-sensiela tal-GĦID TAL-ERWIEĦ tal-Komiks tas-sikkina, jasal it-tielet strixxiklu tal-Kranium: Il-Qamar fil-Bir. Fl-istrixxikli ta' qabel, il-Ħassu raqad ma' Guzzetti ż-żagħka għula u nħotof minnha, jiġifieri serqitlu ruħu biex għamlitu lsir tagħha. Imma l-Ħares tal-Wardija jsejjaħ lil Nar il-Bluh u dan jibgħat lil Guzzetta għand boxxla xjaten. Il-Ħassu jibqa' jdur fid-dinja bla ruh għalkemm ikun irrestawrat xi ftit mis-Sultana l-Ħamra biex jibqa' juża moħħu. Imma ġismu jibda jinbidel f'waħx u d-Draga Żawwaluna tapprofitta ruħha biex tiġbru maċ-ċorma tagħha tal-uħux li jaqduha. Sadanittant iż-żewġ membru l-oħra tal-grupp Kranium jitqabbdu minn patrun klandestin biex iġorrulu ħaġra tal-mejtin. Minn hawn jibda l-għawġ.

Kranium 3 f'Earth Garden 2011

Earth Garden 2011
Is-Sibt u l-Ħadd 4 u 5 ta' Ġunju 2011, il-Komiks tas-Sikkina se nkunu preżenti f' Earth Garden, il-fiera ambjentali f'Tal-Qali, mill-4 ta' waranofsinhar sa billejl. Hemmhekk se jkollna għall-bejgħ it-tielet strixxiklu tal-Kranium, il-grupp rock li jgħaddi minn ġrajjiet strambi. Dan hu l-aħħar mis-sensiela tal-Għid tal-Erwieħ, għadu ġej frisk mingħand l-istampatur u ma ssibuh imkien ieħor ħlief minn idejna. Għalhekk ejjew żuruna ftit f'Tal-Qali u akkwistaw dan l-istrixxiklu mpenġi mill-artist Dell (Robert Zammit) miktub mill-barba Kieli b'tifsila artistika ta' Bin Għisa. Magħna jkollna ukoll il-ħarġiet kollha li s'issa ppubblikaw il-Komiks tas-Sikkina. Din sena, bħas-sena l-oħra, se jkun hemm ħdejna ukoll il-gaj tal-Comic Con u għaldaqstant se tkun opportunità għalikom li tħobbu l-komiks biex taqsmu d-delizzju tagħkom magħna. Narawkom hemm.


Il-qoxra tal-istrixxiklu Kranium 3


Dell ipinġi mal-Komiks tas-Sikkina.