Komiks tas-Sikkina: L-avventura li bdiet minn Malta.

Il-karattru Corto Maltese maħluq fis-snin 60 mill-istrixxikolist Hugo Pratt, se jkun is-suġġett ta’ taħdita u espożizzjoni fil-Kavallier ta’ San Ġakbu bejn it-28 ta’ Novembru u l-24 ta’ Diċembru 2012. It-taħdita se tkun ippreżentata minn Marco Steiner, ġurnalist li jispeċjalizza f’Hugo Pratt u x-xogħlijiet tiegħu. Mill-informazzjoni li ksibna, t-taħdita se ssir fit-28 ta’ Novembru fil-kamra tal-mużika fis-6.00 ta’ filgħaxija bħala inawgurazzjoni għall-wirja bl-isem ta’ “Corto Maltese, the spirit of a journey”.

Corto Maltese, baħħar, vjaġġatur u fittiex tat-teżori, huwa bniedem ta’ ftit kliem, vagabond imma b’qalb tad-deheb li tħenn għall-batut. Twieled il-Belt Valletta fl-10 ta’ Lulju 1887 minn baħri Brittaniku u żingara minn Andalusija, saħħara u prostituta magħrufa bħala “it-tfajla ta’ Ġibiltà”. Il-personaġġ ta’ Corto jissimbolizza x-xettiċiżmu tal-awtur Hugo Pratt, f’dawk li huma asserazzjonijiet nazzjonali, ideoloġiċi u reliġjużi. L-istejjer li jgħaddi minnhom il-karattru ta’ Corto Maltese mimlijin fantasija iżda għandhom sfond storiku u b’doża poetika inġenerali.

Din l-attività hija inizjattiva ta’ l-organizzaturi tal-Comic Con u l-Ambaxxata Franċiża f’Malta, b’tentattiv biex ikun introdott dan il-personaġġ f'Malta iżda li għandu kult għalih b’eluf ta’ segwaċi fil-kontinent Ewropew. F’Malta huma l-ftit li jafu bih u dan forsi minħabba li r-rumanzi grafiċi li kiteb Hugo Pratt mhumiex faċilment disponibbli fil-lingwa Ingliża. Fit-tmenijiet kienu saru numru ta’ traduzzjonijiet iżda jingħad li l-livell tagħhom ma kienx wieħed adegwat. Din is-sena id-dar tal-pubblikazzjoni fl-Amerika, Universe, ippublikat mill-ġdid “The Ballad of the Salt Sea” bħala ri-introduzzjoni tal-personaġġ Corto Maltese fin-dinja anglofona. Jidher li din il-pubblikazzjoni ma ntlaqgħetx tajjeb mal-ammiraturi ta’ Corto Maltese minħabba l-format mibdul minn dak oriġinali ta’ Pratt.

Fil-Lejl Imdawwal tal-2009 kienet ittellgħet rappreżentazzjoni dwar il-karattru ta’ Corto Maltese bħala introduzzjoni tiegħu mal-pubbliku Malti. Matul l-istess żmien li saret din ir-rappreżentazzjoni, xi ħadd sprejja x-xbieha tal-Corto mal-kantuniera ta’ Triq Melita ma’ Triq id-Dejqa, bħallikieku biex iħalli marka, imqar jekk temporanja, li tfakkar ir-rabta, avolja żgħira, ta’ dan il-personaġġ mal-gżira ta’ Malta. B’kollox hemm madwar erbatax-il pubblikazzjoni fil-forma strixxikolata li oriġinarjament inkitbu bil-Franċiż jew Taljan u li aktar tard inqalbu għal bosta ilsna oħra madwar id-dinja.