Komiks tas-Sikkina

Il-Malta Comic Con 2011 - għaddiet ukoll.

2011-11-27T20:28:00.015+01:00

Bħall-attivitajiet l-oħrajn li kellna din is-sena, l-Earth Garden u l-Lejl Imdawwal (Notte Bianca), il-Malta Comic Con waslet ukoll fi tmiemha illum. Dawn nistghu ngħidu li huma l-uniċi opportunitajiet li jipprovdulna lok fejn niltaqgħu magħkom il-qarrejja u dan nieħdu gost nagħmluh u nistennew bil-ħerqa għad-drabi li jmiss, x'aktarx is-sena d-dieħla. Intom li sirtu tafuna għall-ewwel darba u qed tħufu fis-sit tagħna u f'dan il-blogg, nagħtukom merħba filwaqt li nistednukom tkomplu ssegwuna fil-ġimgħat li ġejjin għal xi ħarġiet ġodda tal-Komiks tas-Sikkina.

Il-festival tal-komik din is-sena kien, fl-opinjoni tagħna, suċċess, mimli b'attivitajiet interessanti u artisti talentati u attendenza sabiħa tal-pubbliku. Nirringrazzjaw lill-organizzaturi, il-Wicked Comics u nifirħulhom għal dan is-suċċess. Ħadna gost naraw pubblikzzjonijiet ġodda minn artisti lokali. Nittamaw li dan ir-rittmu jkompli għaddej fis-snin li ġejjin. Prosit lil kulħadd.

Dawn huma l-pubblikazzjonijiet li rajna u li akkwistajna aħna fl-edizzjoni ta' din is-sena:

For Galantry Issue 0 u #1 ta' Fabio Giangolini

Arcana Crusade 1 - Bernard Micallef

Ħal Mudlam Issue 2 - Joseph Bugeja

Apocalypse Rocked Part 1- Dean Fenech

Pilot -Comic Anthology

Piju s-Surġent - Bin Għisa u Dell (Robert Micallef)

Piju s-Surġent fil-Malta Comic Con 2011

2011-11-22T22:27:00.010+01:00

Piju s-Surġent huwa wieħed mill-karattri l-ġodda tal-Komiks tas-Sikkina. Maħluq minn Bin Għisa u mpinġi minn Dell (Robert Zammit), dan il-karattru l-ġdid ikompli jintroduċina mal-kwien tas-seħer bħalma huma d-dragi, tas-setta, s-sħaħar, ix-xjafek u l-kitbiebes. Piju s-Surġent huwa aġent speċjali tal-Qamar, u mibgħut mill-Ħares biex ikisser li dawn li jġibu l-kaos u d-diżordni. Għax Piju ma jaħmilx 'l min jagħmel il-ħsara. B'dirgħajh felħana jeħodha mal-bhejjem feroċi u l-uħux li joħorġu fis-satra tal-lejl.

Piju s-Surġent deher għall-ewwel darba s-sena l-oħra fi strixxiklu speċjali tal-Comic Con. Din is-sena se jkompli fejn ħalla l-aħħar darba biex jiġġieled għalina ċ-ċittadini u 'l dawk li mhumiex magħna se jifqagħhom, jgħattanhom u jġibhom fix-xejn.

Piju s-Surġent huwa strixxiklu wieħed waħdu, jiġifieri storja bla rabta ma' xi sensiela oħra. Jinkludi fih l-istorja tas-sena l-oħra u se jkun għall-bejgħ fil-Comic Con ta' din is-sena fil-Kavallier ta' San Ġakbu, il-Belt, fis-26 u s-27 ta' Novembru 2011.

Malta Comic Con 2011

2011-11-04T22:07:00.005+01:00

Il-festival annwali tal-komiks f'Malta se jsir fis-26 u s-27 ta' Novembru 2011 fil-kavallier ta' San Ġakbu, il-Belt. Se jkun hemm ħafna attivitajiet differenti inklużi films, taħdidiet, wirjiet ta' artisti lokali u barranin eċċ. Aħna tal-komiks tas-sikkkina se nkunu hemm bl-aħħar strixxikli tagħna. Tilifux dan l-avveniment tas-sena intom kollha dilettanti tar-rakkont impenġi. Segwu l-aħħar aħbarijiet u żviluppi fis-sit uffiċċjali tal-Malta Comic Con hawnhekk.

Ħabib fis-suq tal-Lejl Imdawwal

2011-09-25T09:56:00.022+02:00

Liam kien qed ipejjep sigarett fuq il-bejt. Kien qed jipprova jfittex lehma għax ried jikteb fuq il-blogg tiegħu l-aħħar silta minn sensiela ta' stejjer straordinarji. Ix-xemx kienet ilha xi sagħtejn li niżlet u ntfiet fil-baħar tal-punent. Kien waħdu. Is-Sibt filgħaxija sulu sulu. Sa ftit ilu kellu lil Nadine tispirah bi fweħitha, bil-benna ta' xoftejha u ... sa... ftit ilu... Imma issa telqet. Ħallietu. Nifs ieħor mis-sigarett. Is-sema dlam u taħtu twieqi bid-dwal baxxi mixgħula wara purtieri mġerrija. Ftit lil hinn, id-djar u l-palazzi tal-Belt, issa nxtgħelu u bozoz u fanali qawwija rmew baħar ta' dawl li bajjad saħansitra s-sħab li kien għaddej fil-baxx.

Dak x'inhu dak id-dawl? Staqsa bejnu u bejn ruħu.

Illum il-Lejl Imdawwal - wieġeb leħen li ma jafx jekk semgħux tassew jew jekk tlissenx ġewwa rasu.

Niżel isfel u ħareġ mid-dar u telaq jimxi fit-toroq u l-imsieraħ. Kien hemm in-nies. Kulħadd miexi 'l hemm u 'l hawn. Xi uħud libsin pulit, ħiemda għaddejjin dritti jħarsu lejn xi fuljett f'idejhom bħal donnhom qed jagħmlu t-talb tas-seba' visti. Oħrajn ipaċpċu fuq l-imwejjed tal-kafejiet. Kien jidher ċar li kien hemm xi avveniment mhux tas-soltu fit-toroq tal-Belt.

Fejn se naqbad immur? - staqsa lilu nnifsu Liam - Forsi nsib xi lehma.

Ħallini nkunlek ta' raħħab u ndawwrek jien - qallu raġel fih mogħl' hawn, wiċċu bajdani, bla xagħar u bi tbissima li tiġbdek.

Int Liam hux veru? - reġa' staqsa r-raġel liebes libsa intiera bajda silġ bil-qmis sewda u ingravata bajda ukoll.

Iva hekk hu - wieġbu Liam. - U int...?

Jien jisimni Jurik... il-Qamar - wieġbu r-raġel bi tbissima waħda.

Il-leħen ta' dan ir-raġel issa beda jxebbhu ma' dak li sema' ftit ilu jew stħajjel li semgħu jidwi f'rasu. U issa kkonferma dan ix-xebh x'ħin dan Jurik "il-Qamar" tenna : Illum il-Lejl Imdawwal u se ndawwrek jien mat-toroq tal-Belt. Għidli x'tixtieq tara.

U Liam qallu: Irrid nisma' ilħna mielsa li jwensuni. Irrid inxomm fwejjaħ li jiftħu l-moħħ. Irrid induq il-ħlewwa tal-mużika ħelliesa... Irrid insib lehma li tnebbahni... li ddawwalni minn ġewwa.

U Jurik "il-Qamar" ħadu f'teatri u fil-pjazez fejn tbaħbaħ fil-għoġba tal-miġemgħa. Ħadu jisma' daqq li jpaxxi l-widnejn u wrieh xbihat li jbirru l-għajnejn. Sqieh xorb li jnessi u li jfakkar. U temgħu ikel li jaħjih.

Imma Liam baqa' ma sabx il-lehma. U minħabba f'dan sewwed qalbu.

Jurik "il-Qamar" ħabat se jaqta' qalbu minn Liam imma mbagħad ftakar f'post wieħed li ma wriehx u qallu: Naf ħabib fis-suq li jista' jgħinek.

U ġibdu għas-suq tal-Belt, lejn mejda żgħira. Kien hemm raġel b'leħja pulita li kien qed ibigħ kotba rqaq bl-istampi. U bejn il-kotba u l-folji tal-istampi feġġet bħal tieqa li minnha bdiet ġejja żiffa ċċafċaf ħelu ħelu ma' wiċċ Liam u ttajjarlu l-beżbużiet ta' xagħru. U sema' leħen sbejjaħ isejjaħlu u ttawwal għal ġot-tieqa u ra dinja oħra. Ra tfajla samranija b'xuxitha ttir mar-riħ, riesqa lejh, tistiednu, tkellmu kliem li jmiss il-qalb. It-tieqa saret bieb u daħal ġewwa u mar mat-tfajla samranija u daq fommha, issaħħan ma' laħamha tari u twaħħad magħha u ħsiebu xegħel.

Jien Liam - stqarrilha.

U hi weġbitu - Jien Lehma.

Is-Sibt l-1el t'Ottubru 2011 fis-suq tal-Belt.

It-3et strixxiklu tal-Kranium

2011-06-16T22:52:00.003+02:00

Mis-sensiela tal-GĦID TAL-ERWIEĦ tal-Komiks tas-sikkina, jasal it-tielet strixxiklu tal-Kranium: Il-Qamar fil-Bir. Fl-istrixxikli ta' qabel, il-Ħassu raqad ma' Guzzetti ż-żagħka għula u nħotof minnha, jiġifieri serqitlu ruħu biex għamlitu lsir tagħha. Imma l-Ħares tal-Wardija jsejjaħ lil Nar il-Bluh u dan jibgħat lil Guzzetta għand boxxla xjaten. Il-Ħassu jibqa' jdur fid-dinja bla ruh għalkemm ikun irrestawrat xi ftit mis-Sultana l-Ħamra biex jibqa' juża moħħu. Imma ġismu jibda jinbidel f'waħx u d-Draga Żawwaluna tapprofitta ruħha biex tiġbru maċ-ċorma tagħha tal-uħux li jaqduha. Sadanittant iż-żewġ membru l-oħra tal-grupp Kranium jitqabbdu minn patrun klandestin biex iġorrulu ħaġra tal-mejtin. Minn hawn jibda l-għawġ.

Kranium 3 f'Earth Garden 2011

2011-06-04T08:21:00.015+02:00

Earth Garden 2011
Is-Sibt u l-Ħadd 4 u 5 ta' Ġunju 2011, il-Komiks tas-Sikkina se nkunu preżenti f' Earth Garden, il-fiera ambjentali f'Tal-Qali, mill-4 ta' waranofsinhar sa billejl. Hemmhekk se jkollna għall-bejgħ it-tielet strixxiklu tal-Kranium, il-grupp rock li jgħaddi minn ġrajjiet strambi. Dan hu l-aħħar mis-sensiela tal-Għid tal-Erwieħ, għadu ġej frisk mingħand l-istampatur u ma ssibuh imkien ieħor ħlief minn idejna. Għalhekk ejjew żuruna ftit f'Tal-Qali u akkwistaw dan l-istrixxiklu mpenġi mill-artist Dell (Robert Zammit) miktub mill-barba Kieli b'tifsila artistika ta' Bin Għisa. Magħna jkollna ukoll il-ħarġiet kollha li s'issa ppubblikaw il-Komiks tas-Sikkina. Din sena, bħas-sena l-oħra, se jkun hemm ħdejna ukoll il-gaj tal-Comic Con u għaldaqstant se tkun opportunità għalikom li tħobbu l-komiks biex taqsmu d-delizzju tagħkom magħna. Narawkom hemm.

Il-qoxra tal-istrixxiklu Kranium 3

Dell ipinġi mal-Komiks tas-Sikkina.

Malta Comic Con 2010... għors id-dilettanti!

2010-10-17T23:37:00.024+02:00

Fl-atriju ta' San Ġakbu.

Avveniment li ħafna dilettanti tal-komiks, ta' kull sena, saru jistennew bil-ħerqa. Il-festival tal-komiks għadda malajr wara xhur ta' preparamenti mill-organizzaturi u l-artisti kif ukoll mill-kontributuri. Kif jaf kull min żar il-kavallier ta' San Ġakbu, il-festival kien suċċess ieħor wara d-debutt tiegħu is-sena l-oħra fl-istess lok.

Il-mejda tal-Komiks tas-Sikkina.

Imballat b'attivitajiet varji ta' logħob, taħdidiet u kompetizzjonijiet, l-attrazzjoni prinċipali naturalment kienet "il-komik". Għexieren ta' komiks kienu għal wiri bl-awturi tagħhom Maltin u barranin jiffirmawhom għall-ammiraturi tagħhom filwaqt li mijiet oħrajn kienu għall-bejgħ flimkien ma' figorini u mudelli tal-eroj tal-komiks. Id-dilettanti jidhru li kkonkorrew bil-kbir għal dan il-festival li issa donnu daħal b'mod definit fil-kalendarju kulturali popolari ta' pajjiżna. Aħna tal-Komiks tas-Sikkina nappoġġaw bi sħiħ din l-inizjattiva u l-mejda tagħna armata bl-istrixxikli, ma naqsitx li tkun hemm mal-oħrajn. Qattajna jumejn tal-ġenn nitkellmu man-nies li jżuruna u naqsmu magħhom l-ideat tagħna. Nirringreazzjaw lil dawk kollha li xtraw il-komiks tagħna, lil dawk ġodda u lill-oħrajn li jsegwuna mill-qrib.

Biswit il-mejda tagħna, onorati bil-preżenza

ta' missier il-komik Malti : Ġorġ Mallia.

Din id-darba ma kellniex strixxikli ġodda għax il-Barba Kieli qisu qed iqatta' l-blat biex ilesti r-raba' strixxiklu tal-Gawgaw. Imma Bin Għisa qatgħha li jippubblika tifkira għal din il-comic con u ġera wara l-artisti biex jiġbor xi xogħlijiet tagħhom. Ma kinitx faċli. Staqsuh!

L-istrixxiklu tifkira tal-Comic Con 2010.

Imma kien ukoll pjaċir tagħna naraw pubblikazzjonijiet ġodda ta' artisti Maltin għall-bejgħ. Dan huwa żvilupp importanti li nittamaw iżomm ir-rittmu li kull sena nibdew naraw xogħlijiet lokali fis-suq. Prosit lill-kittieba u lill-artisti kollha li qed jikkontribwixxu lejn dan. Nirringrazzjaw ukoll lill-organizzaturi u għal darb'oħra nifirħulhom għas-suċċess tal-Comic Con 2010.

Artists and Story Tellers:

Robert Zammit u Bin Għisa

Anthony Pirotta

Lorry Sultana u Mikiel Galea

Raymond Agius

The Tsar : Joseph Farrugia u Joesph Bugeja

Ħal Mudlam : Joseph Bugeja

The Golden Lizard:

Fabio Agius

Chris Le Galle

Mark Ellul

L-istrixx Nru.14 :
Il-Barba Kieli

Festival tal-Komiks f'Malta

2010-10-15T23:06:00.005+02:00

Il-Malta Comic Con 16 u 17 ta' Ottubru 2010 fil-Kavallier ta' San Ġakbu l-Belt, mill-10 sas-6. Artisti Maltin u mistednin barranin mill-Ingilterra, l-Italja u l-Amerka se jkunu qed jesibixxu x-xogħlijiet tagħhom, ipinġu u jbigħu xogħolhom. Aħna se nkunu hemm bl-istrixxikli tagħna tal-Komiks tas-Sikkina. Ejjew żuruna.

Lejl Imdawwal ieħor.

2010-09-26T02:11:00.008+02:00

Kull avveniment fejn ilaqqagħna ma' ħbiebna u ma' nies oħrajn ġodda, lilna hemm issibna.

Il-komiks tas-sikkina dejjem għatxana għall-imħuħ friski, għall-individwi li lesti biex jixirfu lil hinn minn dak li hu komuni u mhux tas-soltu. Fit-teatru tal-Università l-Qadima, l-MITP, lbieraħ armajna bl-istrixxikli tagħna, mhux daqstant biex inbiegħuhom, aktar milli biex ngħidu kelma ma' sħabna tal-Wicked Comics u man-nies li jitħajru jittawlu fid-dinja tar-rakkonti mpenġija.

Ħajr:
lil Jason tal-għajnuna u tal-birra.
lil tal-Wicked Comics għall-organizzazzjoni tal-wirja
u lil dawk kollha li ġew ikellmuna.

Ljieli f'Tal-Qali

2010-06-08T00:27:00.010+02:00

Muna fil-Palazz ta’ Bedud huwa l-aħħar strixxiklu mis-sensiela tal-Komiks tas-Sikkina. L-istorja tferragħ mir-rakkont tal-ewwel strixxiklu tal-Gawgaw. Lil Muna l-Għaniqa konna ħallejnieha f’idejn it-Tork tat-Taraġ wara li l-Ors tal-Gandlora faqqa’ daqqa ta’ ponn lill-Gawgaw u tefgħu mit-taraġ għal isfel fejn imbela’ f’post jismu BUFIES.

Muna fil-Palazz ta’ Bedud fuq kitba ta’ Bin Għisa u tpinġija tal-Ħaddied, huwa s-sitt strixxiklu u kien qiegħed jinbiegħ għall-ewwel darba f’Earth Garden F’Tal-Qali, is-Sibt u l-Ħadd li għadda. Għalkemm fih m’hemm xejn espliċitu jew oxxen, iddeċidejna li MUNA ma jinbiegħx fil-ħwienet imma mill-idejn jew f’okkażjonijiet bħal din ta’ Earth Garden, li minn żmien għal ieħor tinqala’ xi oħra bħalha u li dwarha ssibu t-tagħrif meħtieġ fuq is-sit-e tagħna jew fuq dan il-blogg. Is-sinjura Ċensura tista’ tmiss lilna wkoll bit-tqasqis tagħha. Irridu naħarbuha kemm nistgħu.

Din id-darba f’Tal-Qali, kellna l-pjaċir li l-mejda tagħna tkun tmiss ma’ tal-Wicked Comics, dawk li jorganizzaw il-Comic Con. Wicked comics ħadu sehem għall-ewwel darba f’din l-attività tal-Earth Garden. Kif xi drabi semmejna ukoll f’dan il-blogg, Wicked Comics jaħdmu biex il-pubbliku Malti jibda’ japprezza iżjed il-medju tal-komik u huwa pjaċir tagħna li naħdmu id f’id ma’ nies li qed jirsistu għal dan il-għan. Wicked comics huwa grupp mimli entużjażmu u ideat u għandu l-potenzjal biex iwettaq il-miri tiegħu. Nawguralu iktar suċċess.

Min-naħa tagħna nixtiequ nirringrazzjaw lil dawk kollha li ltaqgħu magħna f’Tal-Qali u tawna l-appoġġ tagħhom. Kien tassew tmiem il-ġimgħa memorabbli. Grazzi lil tal-Wicked Comics għall-kumpanija dħulija tagħhom u lill-artisti li ttrasformaw l-imwejjed f’attività tbaqbaq bit-talent. Għal darb’oħra! Ma ndumux ma nerġgħu nilaqgħu.

Ħamsa ġewwa.

2010-03-30T23:52:00.027+02:00

Ix-xbejba tal-Ġmiel (it-3et strixxiklu)

Iż-żmien igerbeb u wasalna biex nagħlqu sena mindu nidejna l-ewwel strixxiklu tal-komiks tas-sikkina. Minn dak iż-żmien 'l hawn ħriġna ħames strixxikli b'kollox u wasalna għas-sitt wieħed. Nammettu li dan mhuwiex xi bidu spettakolari u għalkemm xtaqna nżommu appuntament iktar spiss mal-qarrejja ma rnexxielnix nagħmlu dan b'suċċess. Imma qalbna mhux maqtugħha u għalkemm ir-rittmu tal-ħarġiet huwa kajman, sejrin inkomplu bl-istejjer tagħna. Tentattivi biex insieħbu magħna artisti oħra għadhom qed isiru u min hu midħla tax-xena tal-komiks jaf kemm hija iebsa din il-ħaġa. Imma nafu fiż-żgur li għandna segwaċi devoti u bil-ħerqa u s-sabar jistennew l-istejjer li jmiss.

Dan l-aħħar isseħibna ma' grupp fuq sit interessanti tal-komiks indipendenti fejn fost oħrajn hemm sħabna l-Maltin li ltqajna magħhom fil-Comic Con is-sena l-oħra. Hija opportunità tajba biex mal-barranin nuru li f'Malta għandna ukoll kultura tal-komik li qiegħda dejjem tikber. Ferħanin li l-Gawgaw u l-Komiks tas-sikkina jiffurmaw parti minn din il-kultura. Agħtuh titwila hawn lil dan is-sit: INCOMING.

F'Mejju li ġej bħas-sena l-oħra se nerġgħu nkunu f'Earth Garden Ta' Qali. Nieħdu gost jekk taqbżu qabża s'hemm u tiġu tkellmuna. Hemmhekk se tkunu tistgħu takkwistaw is-sitt ħarġa tal-komiks tas-sikkina MUNA FIL-PALAZZ TA' BEDUD li hi fergħa mill-istorja tal-Gawgaw u l-Imlejka imma "strixxiklu wieħed waħdu" jiġifieri rakkont li jibda u jispiċċa fi strixxiklu wieħed. Dwar dan se ssibu iktar tagħrif fis-sit tagħna u 'l quddiem ukoll fuq dan il-blogg.

F'Ottubru se terġgħu ssibuna fil-Lejl Imdawwal il-Belt u disgħa u disgħin fil-mija se nkunu fl-istess post tas-sena l-oħra. Aktarx li fl-istess post se jkun hemm ukoll kartunisti u fanartisti jesibixxu x-xogħlijiet tagħhom f'attività organizzata mill-grupp tal-Comic Con Malta. Niżżluha din bħala nota... aktar dettalji nagħtuhomlkom 'l quddiem.

Kummenti tagħkom:

F'dan it-3et strixxiklu hemm nisġa ta` metafori Maltin tassew bil-għaqal. Xerraqtuni bid-daħq xi darbtejn ukoll. Nispera illi li jmiss joħroġ ma jdumx għax ikolli nissokta mil-ġdid kull darba. PROSIT.

arthur taliana

03/12/2010

skizz mill-Gawgaw it-3et strixxiklu

L-Istorja ma tintemmx hawn...

2010-02-07T23:53:00.012+01:00

It-tielet strixxiklu tal-Gawgaw u l-Imlejka mar n-No Bling nhar is-Sibt li għadda. Mal-mużika Hip Hop ħareġ ir-rittmu u r-rima ta’ stampi u versi flimkien. Fid-dawl baxx tal-Buskett Road House xegħlu l-kuntrasti tad-disinn iswed u abjad u l-istrixxiklu rrakkonta ... mhux l-istejjer tal-Luċija mill-bandli....imma l-ġrajja ta’ Bufies...mnejn ma jiġux nies. Il-ħemda tal-Buskett taħt is-seħer tal-Palazz Verdala, tħalltu mad-daqq tan-No Bling...wirja tassew tajba. Hiphopers kullimkien bħall-mibdulin fid-dar tal-kampanja fejn kien żar il-Gawgaw fi strxx.Nru 2. Tfajliet tal-ġmiel... kielu u xorbu....u żifnu. U mir-rokna mwarrba ta’ ħdejn il-bar, il-Gawgaw issokta bil-vjaġġ tiegħu.

Grazzi mill-qalb lil tan-NO BLING tal-opportunità li tawna biex inbiegħu l-istrixxikli tagħna. L-atmosfera kienet tal-ġenn u spettaklu bomba. Hemm iltqajna ma’ qarrejja ġodda li nittamaw li jkomplu jsegwuna.

Iż-Żmien jagħtina parir jew Aħna l-Qbejjel, bina ħadd ma jitmejjel.

2010-01-17T22:01:00.005+01:00

Wara ħafna nżul u tlajja', it-tielet strixxiklu tal-Gawgaw u l-Imlejka jinsab lest u appik ikun għall-bejgħ fil-ħwienet tas-soltu. Araw b'għajnejkom u idħlu f'din l-avventura tal-għaġeb li wasslet lill-eroj tagħna sa Bufies, fejn ħadd qatt ma mar u ġie lura. Hemmhekk jiltaqa' mal-mibdulin, nies kapaċi bħalu, mal-mifhuma, persunaġġi tal-fenominu u mal-qbejjel, razez li mhumiex bnedmin. Miegħu għixu l-mumenti mwiegħra fil-għawġ li jidħol fih biex minnu, bħal ma jagħmel dejjem, joħroġ rebbieħ.

Nafu li ħafna minnkom saqsew għat-tielet strixxiklu u stennejtuh bil-ħerqa. Nittamaw li l-istennija tagħkom se tissarraf f'sodisfazzjon hekk kif issegwu t-tielet parti ta' din l-ġrajja epika u poetika.

Is-sena t-tajba.

2010-01-01T16:55:00.006+01:00

L-Imlejka xxomm il-fjuri fl-ewwel tas-sena.

Misluta mill-kitba tal-ewwel strixxiklu Il-Gawgaw u L-Imlejka :

L-IMLEJKA hija s-sultana tax-xhur kollha tas-sena. F’nofs il-lejl tal-aħħar tas-sena toħroġ fit-toroq u ddur id-djar kollha. F’dar fejn issib riħa tfuħ ta’ ħafna ward u fjuri tħalli r-risq u l-barka, imma fejn issib riħa ta’ għeluq u għaraq iġġib il-fell jiġifieri risq ħażin - imma r-risq suppost li qatt ma hu ħażin; dejjem tajjeb.

L-Imlejka tidher bħala tfajla fiha ġisem li tkun liebsa seba’ msaxet (plural ta’ mustaxija, li jkun drapp irqiq u trasparenti), u xejn minn taħt. F’kull raħal li tgħaddi, jew malli taqbeż il-konfini ta’ Kunsill Lokali u tidħol f’ta’ ieħor, tħalli mustaxija milli tkun liebsa mal-ħabbata tal-bieb tas-Sindku. Jiġifieri ma ddumx ma tispiċċa b’xejn, b’id waħda wara u l-oħra quddiem. Peress li fiha ġisem, l-Imlejka hi ftit duttura u ma torqodx ma' kulħadd. Mela jekk xi darba f’nofsillejl tal-aħħar tas-sena jfettillek tqum mis-sodda għal xi raġuni jew oħra u tara mara għarwiena xxomm il-fjuri li ommok tkun ħalliet fil-vażun fis-salott, aħsibha għal darba darbtejn x’se tagħmel b’idejk. L-aħjar li tinġibed lura, tigdem ilsienek, u terġa’ tmur torqod.
Il-ħbieb tal-Imlejka huma x-Xemx, il-Qamar, il-Kwiekeb, l-Irjieħ, is-Siġar, il-Widien, l-Għoljiet, l-Irdumijiet, l-Istaġuni u x-Xhur kollha tas-sena.

skizz : xbiha tal-Imlejka

SĦAĦAR U EĦIRSA MALTIN

2009-12-23T01:03:00.004+01:00

Din li ġejja slitnieha mis-sit e tal-Komiks tas-Sikkina

Malta aktarx li hi l-uniku pajjiz fid-dinja li l-kultura tiegħu ma tinkludix persunaġġi tal-fantasija li huma magħrufa u aċċettati bil-ferħa jew bil-biza' fil-fantasija kollettiva tal-poplu. ĠAĦAN hu xi ftit magħruf fostna imma, minkejja kollox, spiċċa karattru daqsxejn taz-zufjett u m'għandux il-ħakma fuq moħħ in-nies li għandhom karattri ta' ġnus oħra. Il-ĦARES ukoll spiċċa jagħmel parti mid-dinja tan-nanna Gerit u illum ftit hawn min għadu jagħti kasu. Ħaddieħor għandu l-fairies, u l-pixies, u lil Superman, u lil Batman, u lil Father Christmas, u lil La Befana, u lil Pinokkjo, u l-Drakula, u l-Frankenstein, u aħna kuntenti nilludu ruħna li dawn il-karattri huma tagħna wkoll, meta fil-fatt m'humiex. Kuntenti nbossu b'sorm ħaddieħor u lil tagħna nagħtuh bis-sieq. Għax moħbija bejn il-versi tal-ilsien Malti, karattri tal-fantasija HEMM - imma ma rridux nafu bihom. Il-Ħares hi kelma li tfisser "gwardjan/għassies" - xi ħadd li qed iħares x'imkien jew xi ħaġa (mhux veru li ġejja mill-kelma Latina Lares, imma minn għerq ta' verb Malti, bħal meta ngħidu "Alla jħarisna" jew "Alla ħares"). Mela l-Ħares hu għassies u hu differenti minn Ruħ jew Fatat; u l-istejjer tal-ħares li nafu bihom juruk li hu persunaġġ differenti minn ruħ jew fatat. Ix-XJAFEK insemmuhom mingħajr ma jgħaddilna minn rasna x'jistgħu jkunu. L-kelma "GĦAFRIT", dari komuni ħafna, llum qed tintnesa. L-GĦUL diġa ntnesa, imma dari kien magħruf ħafna, kemm hu u kemm in-Nanna Għula. Tgħid jirnexxielna naħtfu lil dawn il-karattri minn xifer l-abbiss tal-estinsjoni? Kull bidu hu iebes. Jgħidu li qabel ma l-aħwa Grimm qabdu l-ħrejjef li kienu jafu, u daruhom tidwira sewwa, il-ħrejjef u l-karattri tagħhom kienu ħorox, u jinbuttawk, u xi ftit ħamalli. Illum saru industrija internazzjonali.

Comic Con Malta...suċċess!

2009-11-02T20:43:00.014+01:00

Fl-opinjoni tagħna u ta' ħafna oħrajn il-Comic Con kienet suċċess, kemm mil-lat ta' organizzazzjoni kif ukoll mill-aspett intrakulturali tad-delettanti tal-komiks f'Malta. In-nies ikkonkorriet sewwa, iktar milli mistenni meta tqis in-nuqqas ta' interess tal-pubbliku lejn dan il-medju.

Dawra mal-imwejjed fis-swali ta' San Ġakbu, (aqta' barra dawk tal-artisti mustaċċuni barranin) kienet biżżejjed biex wieħed jinnota t-talent ta' bosta artisti lokali żgħazagħ. Il-Manga hi popolarissma u ħafna mill-esebituri ħadmu fuq dan l-istil ta' tpinġija Ġappuniża. Innutajna li xi wħud minnhom ukoll pinġew l-istrixxiklu tagħhom u kienu għadhom fil-proċess tat-tifsil jew tad-disinn finali. Prosit lil dawk kollha li rnexxhielhom jaslu s'hawn. Aħna nafu li t-triq biex tippubblika xogħol ta' dan it-tip hija waħda twila. Nawgurawlhom li jkomplu mixjin 'l quddiem u jegħlbu l-kurrenti negattivi li jsibu ma' wiċċhom. Jekk iżommu quddiem għajnejhom lill-eroj tal-komiks tagħhom, għandhom mnejn jirbħu l-battalja.

Ħadna gost naraw għaqdiet li fihom jissieħbu l-artisti biex iwettqu xi ħaġa flimkien jew biex juru x-xogħol tagħhom. Dawn huma inizjattivi tajbin li jagħtu żvog kulturali u artistiku fost il-ġenerazzjoni l-ġdida imxerrda "mat-tmint irjieħ" ta' pajjiżna. L-organizzaturi jixirqilhom il-prosit għal din il-konvenzjoni tal-komik li tat l-opportunità biex l-artisti jsiru jafu lil xulxin u tat ukoll il-possibiltà lill-pubbliku biex isir jaf iktar dwar il-komiks u l-utilità tagħhom fis-soċjetà moderna tagħna tal-lum. Għalina il-Comic Con swiet ħafna f'dan ir-rigward. Min-naħa tal-Komiks tas-Sikkina se nkomplu nagħtu l-kontribut tagħna anki jekk f'moħħna għandna li nibqgħu xi ftit klandestini.

Iktar dwar il-Comic Con Malta

2009-10-26T10:07:00.009+01:00

Rubrika ta' Stefan Cachia fuq fuq il-gazzetta ta' kull nhar ta' Sibt Il-Ġensillum. Hawn ukoll l-artiklu fuq l-internet:
Il-komiks f'Malta: karriera diffiċli imma tagħti frott sabiħ.
Stefan Cachia tkellem ma’ Chris Galea dwar il-komiks f’Malta u din il-konferenza:

"X’inhi Wicked Comics?

Wicked Comics hi għaqda li taħdem b’mod volontarju bil-għan li tippromwovi l-kultura tal-komiks u affarjiet relatati magħha bħal films u logħol tal-vidjow f’pajjiżna u barra minn Malta. Hi għaqda żgħira mmexxija minn tijm ta’ sitt persuni, waqt li bosta persuni oħrajn, fosthom ħafna artisti lokali, huma involuti fl-organizzazzjoni tal-Wicked Comics.

Wicked Comics twaqqfet fl-2005 bl-iskop li tgħaqqad bosta artisti lokali u tipprovdi l-infrastruttura neċessarja biex ix-xena tal-komiks f’Malta tinbet u tissaħħaħ. L-ewwel attività tagħha kienet il-Big Bang, konvenzjoni fuq skala żgħira mtella’ fuq inzjattiva ta’ Chris Gatt, Direttur ta’ St James Cavalier). Minn din il-konvenzjoni ħarget Wicked Comics."

"Taħseb li jeżisti suq għall-komiks lokali f’Malta?
Għalkemm Malta hi gżira żgħira, aħna ċerti li hawn suq għal komiks lokali f’pajjiżna. Fil-fatt, l-għaqda tal-Komiks tas-Sikkina diġà qed jippubblikaw xi komiks bil-Malti u jidher li dawn qed jintlaqgħu tajjeb mal-pubbliku lokali.
Il-membri tal-Wicked Comics jemmnu li ġaladarba l-livell tal-komiks ikun għoli, is-suq jirrispondi b’mod pożittiv. Madankollu nemmnu u nittamaw li l-artisti lokali jagħmlu xogħol li jiġi apprezzat mhux biss f’pajjiżna iżda mad-dinja kollha."

Ikklikkja fuq l-istampa biex tkabbar.

Malta Comic Con 2

2009-10-20T10:04:00.006+02:00

Il-Comic Con fuq l-għatba u qed tħabbat il-bieb. Ġimgħa u nofs oħra nkunu hemm bl-istrixxikli tagħna u nittamaw li jkun hemm konkorrenza tajba fis-swali tal-Kavallier. It-tielet "Gawgaw" se jkun hemm ukoll nisperaw, għalkemm din l-aħbar għadha mhix ikkonfermata imma kulħadd fuq ix-xwiek biex jara mil-liema għawġ se jgħaddi l-Gawgaw fit-tielet strixxiklu u fejn ix-xjafek se jsib lil xbintu l-Imlejka. Nistennew u naraw.

Fost il-pubbliċità li għaddejha bħalissa għall-Konvenzjoni tal-Komik inkitbet rubrika fis-Sunday Circle minn Michael Vella. Nieħdu gost naraw dan l-interess u nittamaw li dan ikompli jikber. Id-diriġenti tal-comic con Malta qed jissodisfaw bosta dilettanti tal-komiks bl-attivitajiet li se jkun hemm u nispera li dan kollu jattira ukoll nies ġodda lejn dan il-medju affaxxinanti.

Ir-rubrika Circle ta' Michael Vella

Lejl Imdawwal

2009-10-02T09:27:00.016+02:00

Għandna xi attivitajiet importanti ġejjin u bħal ma nagħmlu s-soltu nagħrfukom xi ħaġa dwarhom. Il-konvenzjoni tal-komik (Comic Con Malta) diġà semmejnieha u se nkomplu naġġornawkom fuq xi żviluppi li jkun hemm . Bħalissa issibuna fl"Artists' Alley" fuq l-istess sit.

Se nkunu preżenti f'attività oħra s-Sibt li ġej fit-Teatru tal-Università l-qadima (MITP) ta' Triq San Kristofru l-Belt, fl-okkażjoni tal-LEJL IMDAWWAL. Fit-teatru se jkun hemm rappreżentazzjonijiet tad-dramm "Cultivating Insanity" ta' Sean Briffa u xi wirjiet viżivi oħra. Id-dramm hu ta' xi għoxrin minuta u jibdew bl-ewwel rapp fid-disgħa ta' filgħaxija u jirrepetu kull siegħa. L-aħħar waħda tkun f'nofsillejl. Dħul b'xejn. Lilna ssibuna hemm ukoll bl-istrixxikli tal-Gawgaw u l-Imlejka u l-Kranium. Nieħdu gost niltaqgħu magħkom. Għal min għadu ma akkwistax l-aħħar strixxikli, issa ċ-ċans! Għal dawk il-qarrejja ġodda li jridu jiksbu l-erba' ħarġiet f'daqqa, nirranġawlhom xi skont ukoll.

Attività interessanti li mhux ta' min jitlifha fil-Lejl Imdawwal u li għandha x'taqsam mal-istrixxikli Taljani u Franċiżi hija r-rappreżentazzjoni teatrali ta' Pino Scicluna tal-karattru Corto Maltese. Probabbilment, din se tkun l-ewwel darba li l-Corto Maltese se jkun ippreżentat quddiem pubbliku Malti. Dan il-karattru li ħoloq Hugo Pratt fl-1967 li twieled Malta fil-Belt Valletta fl-1887 (għalhekk hu mlaqqam Corto Maltese) huwa vjaġġatur u avventurier li jdur id-dinja filwaqt li jsib ruħu involut fi stejjer kumplessi fi sfond politiku u fantastiku. Din ir-rapp se ssir f'Misraħ l-Indipendenza il-Belt fis-7.45, fid-9.30, fil-11.00 u fis-1.00 ta' bilejl. Ta' min jittawlilha.

Info Gazzetti:
Artiklu kritiku ta' Michael Vella dwar l-ewwel strixxiklu ta' Il-Gawgaw u L-ImLejka deher fuq The Times 12 ta' Settembru 2009.

Għandna nkomplu!

2009-09-18T00:25:00.013+02:00

Waħda mill-affarijiet sbieħ meta tkun involut fi proġett bħall-Komiks tas-Sikkina hu li tibda tiltaqa’ ma nies interessati f’dak li tkun qed tagħmel. Issib min jinkoraġġik biex tkompli u ssib min juri xettiċiżmu jew indifferenza. Nafuha, li f’Malta nsibu ħafna li ma jaqrawx komiks u għalhekk l-appoġġ morali jiġi minn ċirku żgħir ta’ nies li jew ikunu midħla ta’ dan il-medju nkella minn oħrajn li jinteressahom iċ-ċaqliq kulturali, żgħir kemm ikun żgħir.

Imma aħna tal-KtS għandna qalbna qawwija li se nirnexxu. Nammettu li minbarra l-gost tagħna biex nipproduċu l-istrixxikli tal-Gawgaw u l-bqija, hemm ukoll ix-xewqa li x-xogħol tagħna jkun rikonoxxut minn udjenza alternattiva. Ma nistgħux ingorru mir-rispons li ħadna s’issa, għal kuntrarju, ninsabu f’punt fejn qed nagħrfu li hawn għatx kbir għal ideat bħal dawn u dan lilna jimlina bil-kuraġġ biex inkomplu. Smajna ukoll dan l-aħħar bi xniegħa li f'Malta nxtraw kopji tal-Gawgaw iżjed mill-comics ta' Superman. Possibbli? Jalla l-ġid! Li hu żgur li m’aħniex se noħorġu komiks daqs kemm joħorġu tiegħu mid-DC.

Il-proċess biex inlestu dawn il-Komiks tas-Sikkina huwa wieħed li jieħu ż-żmien tiegħu. Hija battalja qalila mal-ħin, akrobazija perikoluża bejn id-dmirijiet personali, qadi ta’ kuljum, xogħol u rikreazzjoni, biex x’imkien bejn dawn il-manuvri, tissawwar l-idea tagħna fuq karta u tippubblika ruħha fi strixxiklu. Nifhmu li dan ukoll hu apprezzat minn min isegwina imma finalment l-akbar apprezzament tagħkom ikun meta wara dawn il-manuvri kollha moħbija, jasal f’idejkom l-aħħar strixxiklu biex idaħħalkom fid-dinja bla tarf tar-rakkonti tagħna.

Il-Barba Kieli fuq it-tielet strixxiklu tal-Gawgaw u L-Imlejka.

Comic Con Malta

2009-08-27T20:17:00.009+02:00

Xi tliet snin ilu kienet saret għall-ewwel darba f'Malta, dik li sejħulha l-"Big Bang" comic convention fil-Kavallier ta' San Ġakbu organizzata minn "Something Wicked". Kien tentattiv utli ħafna għax laqqa' flimkien id-delittanti tal-komiks f'Malta u espona l-artisti li huma interessati f'dan il-medju. F'dawk it-tliet ijiem saru attivitajiet diversi bħal taħditiet, wiri ta' films u wirjiet artistiċi, workshops, u attività kummerċjali permezz ta' ħwienet ibigħu il-komiks u l-mechandise. Kollox ma' kollox kienet esperjenza tal-o u kienet opportunità tad-deheb għall-artisti biex isiru jafu lil xulxin. Minnha kellha titwieled pubblikazzjoni li l-ewwel kellha tkun e imbagħad stampata iktar 'il quddiem. Grupp ta' artisti bdew jaħdmu fuq din il-pubblikazzjoni fil-forma ta' komik imma l-miri sfortunatament ma ntlaħqux. Storja li tiġri ta' spiss.

Imma issa s-"Something Wicked" se jerġgħu jfaqqgħulna comic con oħra ikbar u aqwa minn tal-aħħar darba. Aħna tal-komiks tas-Sikkina, ilna nistennew dan l-avveniment biex nipparteċipaw fih, sa minn meta bdejna naħdmu fuq il-Gawgaw u l-sħabu. F'laqgħa li saret din il-ġimgħa kellna l-opportunità li nitkellmu mal-organizzaturi biex ikollna mejda f'din il-konvenzjoni u nesponi l-istrixxikli tagħna hemmhekk. Se jkun pjaċir tagħna li nieħdu sehem f'dan l-avveniment li aħna inħossu li hu ta' ħtieġa biex "ir-rakkont impenġi" jsir parti mill-kultura tagħna l-Maltin. Nittamaw li l-istrixxikli tagħna ma jkunux l-uniċi pubblikazzjonijiet lokali hemmhekk u li l-interess għax-xogħol artistiku lokali jikber permezz ta' din il-Comic Con f'Malta. Kif ikollna iktar dettalji dwarha, nagħtuhomlkom fuq dan il-blogg u nillinkjawkom mas-sorsi uffiċċjali.

Magħmudija tan-nar.

2009-08-06T10:15:00.014+02:00

Nuruh il-qrun.

Kif qed taraw is-sit reġa' lura għan-normal. Hija inzertatura kattiva li kull darba li nagħmlu kuntatti ma' qarrejja potenzjalment ġodda, jinqala' xi żikk fil-websajt. Jista' jagħti l-każ li xi ħadd għamlilna xi magħmul għax għandu xi lanżita għalina. Jekk inhu hekk, aħna nuruh il-qrun biex inbiegħdu minna din is-saħta ta' Bedud. Imma insomma...ngħodduha mal-oħrajn.

Il-kliem bħaċ-ċirasa u la qed nitkellmu fuq il-magħmul tajjeb li ngħidu xi ħaġa fuq il-Kranium. Minħabba t-taħbit li taf tagħti l-ħajja, qajla sibt il-ħin biex insemmihom sewwa fuq dan il-blogg. Kif tafu minbarra s-sensiela tal-Gawgaw u L-Imlejka, il-Komiks tas-Sikkina ħarġu sensiela oħra bl-isem ta' L-Għid tal-Erwieħ bl-ewwel żewġ strixxikli ddedikati għall-Kranium. Deskrizzjoni tal-Kranium issibu kemm tridu fuq is-sit elettroniku tagħna, kif ukoll fuq l-ewwel ħarġa tal-Għid tal-Erwieħ permezz tal-magażin fittizju ŻENG li hemm fl-aħħar paġni. Għalhekk mhux lok li noqgħod indawwar l-istess diska li diġa smajtu.

Li rrid ngħid fuq Kranium hu rakkont żgħir ta' kif nibtet l-idea ta' dan il-grupp fuq il-komiks. Fil-bidu meta Bin Għisa u l-barba Kieli kienu qed isawwru l-ewwel paġni tal-Gawgaw, tfaċċa l-ħaddied itajjar in-nar minn idejh bil-lapes u l-pitazz iħożż skizz wara ieħor ta' kull rokna fil-Belt u mitt ħaġa u nofs. Bħal ma naraw fil-komiks, dak il-ħin xegħlet bozza minn dawk tal-ideat fuq ras Bin Għisa u l-barba u minn hawn u minn hemm webbluh biex jibda jpenġi magħhom. Għall-ewwel beda jpenġi t-tielet strixxiklu tal-Gawgaw u f'ġimgħa biss, ħalliehom b'ħalqhom miftuħ meta kien diġa lesta kważi l-paġni kollha. Din il-bravura feġġet bħal oażi f'nofs deżert, in vista li x-xogħol tal-barba Kieli, dejjem donnu ġej min-naħa l-oħra tad-dinja, daqs kemm hu għajjien u kajman. Iżda Bin Għisa ra li l-istil different tal-ħaddied seta' jtellef mill-kontinwazzjoni tar-rakkont tas-sensiela u qatagħha li jkompli jistenna u jitherra sakemm il-barba Kieli forsi xi darba jlesti s-sensiela kollha hu.

Hawnhekk Bin Għisa staqsa l-Barba jekk kellux xi storja oħra għall-ħaddied u dak ħareġ waħda minn xi pitazz li kienet diġa bdiet tieklu l-kamla. Bi ftit irtokki minn hawn u xi tibdiliet 'l hemm, isawwar il-grupp Kranium u l-ġrajjiet tal-erwieħ eċċ. Il-ħaddied daħal għal dan il-proġett b'entużjażmu ġdid għax hu wkoll kien daq xi ftit minn dik il-ħajja xellerata u mħawda li kultant jgħixu l-gruppi Maltin. L-istejjer tal-fatati huma wkoll parti mill-memorja tat-tfulija u Kranium daħal fil-forġa tal-fantasija u ħareġ iffurmat fuq l-inkwina tal-ħaddied kif qed tarawh f'idejkom illum.

paġna minn Kranium 2

ID-DOMAIN TeLaq !!

2009-08-03T22:49:00.010+02:00

Għalikom li qed tippruvaw tidħlu fuq is-sit elettroniku tal-Komiks tas-Sikkina, niskużaw ruħna magħkom għax jidher li hemm xi falliment serju fid-domain tl (ħaġa li m'għandniex kontroll fuqu). Sakemm jiġi kollox għan-normal (jekk jiġi kollox għan-normal!!) se nitfgħu t-tagħrif tal-paġna tad-Daħla fuq dan il-blogg. Jekk il-problema tippersisti se ninfurmawkom iktar 'il quddiem biex ngħidulkom fuq liema sit se nqiegħdu t-tagħrif illi kellna fuq http://komikstassikkina.page.tl/

Daħla

TAL-KOMIKS TAS-SIKKINA JIFTEHMU MAL-BRIKKUNI. Il-BRIKKUNI huma grupp ta' artisti mqarbin li tgħidx kemm huma bravi. F'idejhom, l-istrumenti jitkellmu, mhux idoqqu. Il-kliem tal-kanzunetti hu naqra buffu imma jagħmel ħafna sens. Fil-31 ta' Lulju taw kunċert fil-Buskett Roadhouse, ir-Rabat. Aħna konna hemm bit-tieni strixxiklu tal-KRANIUM għal-bejgħ flimkien mat-tliet komiks l-oħra wkoll.

It-tieni strixxiklu tal-Gawgaw u l-Imlejka issa ilu ftit li ħareġ. Il-Komiks tas-Sikkina qegħdin għall-bejgħ f'dawn il-ħwienet: L-Agenda tal-Universita Tal-Qroqq, u l-Agenda ta' Triq ir-Repubblika, l-Belt; Il-Malta Comics and Collectibles, 60, Triq San Duminku, Tas-Sliema; Palmyra, ta' Triq in-Naxxar, Birkirkara; Velmor Stationary, Pjazza Antoine De Paule, Raħal Gdid; Aw Tribu! ta' Triq Ħaz-Zabbar, il-Fgura; u St. Anne's Emporium, Triq Sant'Anna, l-Furjana. Il-Klabb Kotba Maltin tal-Belt għandhom ukoll għall-bejgħ l-ewwel strixxiklu tal-Gawgaw. U issa l-Komiks tas-sikkina qegħdin ukoll fuq Ebay.com!

Għalissa, il-Komiks tas-Sikkina huma magħmula minn żewġ sensiliet: Is-sensiela tal-Gawgaw u l-Imlejka, li se jkollha mill-anqas ħames strixxikli, (jekk mhux iżjed); u sensiela oħra bl-isem ta': l-Għid tal-Erwieħ, li tirrakkonta l-istorja tal-grupp mużikali KRANIUM.Iż-żewġ sensiliet huma indipendenti minn xulxin, u huma mpenġija minn artisti differenti. Il-karattri ta' ġo fihom għandhom ismijiet li jinstabu fil-vokabularju tal-ilsien Malti: Il-Gawgaw, il-Ħajbu, il-Ħares, il-Mingħul, it-Tork tat-Taraġ, il-Ħanżira tal-Erwieħ, Ninu Xkora, eċċ. IMMA nixtiequ nserrħulkom raskom li dawn l-istrixxikli m'humiex xi antikalja ta' Wenzu u Rożi, jew xi "folklor", jew xi tagħlim tal-istorja ta' Malta jew ta' ħrejjef missirijietna. HEMM xi elementi tal-ħrejjef, imma dawn l-istrixxikli huma maħsuba għall-kbar (tal-anqas dawk 'il fuq minn sittax-il sena), huma friski u moderni, u anke xi ftit imqarbin. Aqrahom biex tara.

Mela ħa nerġgħu ngħidulkom: Dawn il-komiks jistgħu jinxtraw mill-Agenda tal-Universita', Tal-Qroqq u l-Agenda ta' Triq ir-Repubblika, l-Belt; mill-ħanut tal-Malta Comics and Collectibles, Nru 60, Triq San Duminku, Tas-Sliema (kantuniera ma' Triq Manwel Dimech), minn għand Palmyra ta' Triq in-Naxxar, Birkirkara, Velmor Stationary tal-Pjazza ta' Raħal Ġdid, minn għand St. Anne's Emporium ta' Triq Sant'Anna, l-Furjana u mingħand Aw Tribu! ta' Triq Ħaż-Żabbar il-Fgura. Nieħdu gost ħafna nisimgħu minn għandkom. Ikkuntattjawna.

Tal-Mickey Mouse.

2009-06-03T15:45:00.025+02:00

Kif jistgħu jidhru l-qoxriet tal-istrixxikli fil-futur.

Id-dinja trid teħodha biċ-ċajt. Imma hawn nies jeħduha bis-serjetà żżejjed. Għad hawn nies li jaħsbu li l-ktieb "Sqaq l-Infern" ta' Bartolo u Vella, fih xi kodiċi sigrieti biex jinġibdu t-tfal lejn il-qawwa tax-xitan. Oħrajn ħarġu jiktbu fil-gazzetti biex il-ktieb ta' Trevor Zahra "Il-Ħajja sigrieta tan-Nanna Ġenoveffa" jitneħħa mill-ixkafef tal-ħwienet tal-kotba u l-libreriji ħalli ma jintlaħaqx mill-minorenni. Bil-kemm m'humiex jissuġġerixxu li għandhom jinġabru l-kopji kollha u jagħtuhom sulfarina f'Misraħ il-Ħelsien. Imma għal dawn it-talin, id-dinja hija serjissima tassew. Għaldaqstant tarahom isegwulek il-passi bizarri ta' Angelik Caruana jew jintefgħu jitpaxxew bil-vjolenza u d-dmija tal-Passion of the Christ. Ħdejn ix-xeni li naraw f'dawn it-tnejn tal-aħħar, il-kotba li semmejt qabel, qishom tal-Mickey Mouse. X'hemm isbaħ mill-Mickey Mouse biex tidħak u titbissem?

Ma nafux sewwa għaliex, imma diġa bdiet tixgħel l-bozza l-ħamra għall-Komiks tas-Sikkina. Diġa kien hemm ħanut li rrifjuta li jbigħhom u minn ħanut ieħor tneħħew il-kopji kollha wara li rċevew xi lmenti. B'daqshekk x'fiha? Affarijiet normali dawn. M'aħniex se nqattgħu xagħarna fuq dil-biċċa tafux. M'hemmx min ma jbigħx gazzetta għax tkun ta' kulur jew ieħor? M'hemmx min ma jbigħx kondojiet għax tniggżu l-kuxjenza? Imbilli jirrifjutaw il-Komiks tas-Sikkina...x'fiha b'daqshekk? Xejn affattu!

Aħna sa mill-bidu nett għedna li dawn l-istrixxikli mhumiex għal kulħadd. Mill-ewwel irrealizzajna li l-kontenut tagħhom hu potenzjalment ta' periklu għal sezzjoni mdaqqsa taċ-ċittadini Maltin. Fil-fatt qabel nidejna l-istrixxikli fil-pubbliku, stħarriġna xi ftit ir-riskji u għamilna t-testijiet meħtieġa. Mill-ewwel strixxikli tal-Gawgaw u tal-Kranium, aħna slitna estratt rappreżentattiv tal-istejjer u tal-immaġni mill-materjal u esponejnieh quddiem xi volontiera fl-esperiment. Numru mill-volontieri rrappurtaw xokk kulturali, dardir emozzjonali u taħwid ċelebrali. Saħansitra rreġistraw kriżi morali fl-imġieba tagħhom. Fil-fatt għoxrin fil-mija tal-volontieri nnotaw dawn l-effetti ħżiena fuqhom u esperjenzaw sintomi oħrajn bħal "jaqbżulhom għajnejhom 'il barra", " jagħmlu taħthom bil-biża'", u "jilluċinaw xeni ta' biki u tgħażżiż tas-snien". Il-konklużjoni tat-testijiet fuq dawn l-20% kienet li l-materjal espost għalihom kien tossiku, xokkanti u demoralizzanti. Sebgħin fil-mija tal-volontieri ma ħassewx dawn l-effetti negattivi għax instab li diġa kienu esposti għal materjal tossiku ieħor miċ-ċinema Hollywoodjana u d-dvds u t-telenovelli fuq ix-xandir lokali u tas-satellita. Fil-fatt minn dawn l-eżemplari kien hemm indikazzjoni ċara ta' apatija qawwija u indifferenza lejn il-materjal tal-Gawgaw u l-Kranium. Min-naħa l-oħra, għaxra fil-mija tal-individwi li applikaw għal dan l-isħarriġ irreġistraw sensazzjonijiet pożittivi u affermaw li ħassewhom aħjar wara li raw u qraw il-materjal mill-istrixxikli.

Wara dawn it-testijiet skont il-kriterji u r-regoli tas-saħħa kif rikjesti mill-Unjoni Ewropea, aħna kellna nwaħħlu t-twissija ta' 16+ imma jista' jkun li nkunu mġiegħla mill-istess Unjoni biex inwaħħlu twissjiet oħrajn wara l-ilmenti li saru biex ikun protett iċ-ċittadin Malti u dak Ewropew...

Mhux aħjar neħduha bin-nejk!

Ħbieb fis-suq.

2009-05-26T23:24:00.009+02:00

Fil-wesgħa allokata għall-mużiċisti u l-artisti waqt l-Earth Garden 2009 kien hemm aħna tal-Komiks tas-Sikkina. Jumejn Ta’ Qali f’xemx taqli l-ġrieden, sirna ħomor skarnati. Konna qisna tliet awwisti f’borma misħun.

Kienet okkażjoni sabiħa fejn iltqajna mal-qarrejja ġodda tagħna. Rajna interess minn etajiet differenti u ħafna ħeġġewna biex nibqgħu sejrin bis-sensiliet li ħriġna. L-interess tan-nies kien kważi l-istess kemm lejn il-Gawgaw u l-Imlejka kif ukoll lejn il-Kranium. In-nies li kkonkorrew u xtraw l-istrixxikli, għalkemm mhux bil-mijiet, kienu għalina biżżejjed biex nagħmlu iktar il-qalb sabiex nkomplu bir-ritmu fil-ħruġ regolari tal-Komiks tas-Sikkina.

L-isfida li għandna quddiemna hija din, li nżommu dan ir-ritmu u fl-istess ħin intejbu l-kwalità tal-istampar. Din tal-aħħar nistgħu nagħmluha biss jekk naraw żieda fil-bejgħ għax bħal ma jaf kulħadd l-ispejjeż biex tistampa huma kbar u għalhekk dawn l-ispejjeż jistgħu jinfdew biss billi tikber id-domanda għalihom. Dan sakemm ma nsibux min jisponsorizzana! Imma aħna deċiżi li pass pass naslu sa fejn irridu u ma ndumux. It-tir tagħna hu li nkomplu nipprovdu stejjer tajbin fuq strixxikli stampati b’xi kulur jew iżjed imqar fil-qoxra. Sa ma jasal dak iż-żmien, aħna ċerti li l-qarrejja tal-Komiks tas-Sikkina, se jkomplu jsegwu l-istejjer fuq il-karta stampata diġitalment mingħajr ma jitilfu imqar nitfa mis-sugu u mill-atmosfera li ħalqu l-awturi u l-penġejja. Għalhekk inħeġġukom tappoġġawna kemm tistgħu billi tixtru l-istrixxikli tas-sensiela, li kif tafu, mhumiex għaljin. Grazzi mill-qalb.

Sadanittant nissoktaw naġġornawkom b’xi tagħrif.

Fil-Fiera tal-Ktieb Malti li se ssir nhar il-Ħamis, il-Ġimgħa, u s-Sibt, 28, 29, u 30 ta' Mejju fl-Auberge d'Italie, Triq il-Merkanti, l-Belt, se jkun hemm ukoll il-Komiks tas-Sikkina.

Il-ħarġiet li bħalissa jinsabu għal bejgħ huma dawn:
Il-Gawgaw u l-Imlejka – l-ewwel strixxikl (ħarġa April 09) mill-ħwienet
L-Għid tal-Erwieħ (Kranium) – l-ewwel strixxiklu – (ħarġa Mejju 09) mill-ħwienet
Il-Gawgaw u l-Imlejka – it-tieni strixxiklu (ħarġa Ġunju 09) mill-Fiera tal-Ktieb Malti.

Filwaqt li l-Kranium (l-1el strixxiklu) dalwaqt se jitqassam fil-ħwienet li qed ibigħu il-Komiks tas-Sikkina (araw fil-ġenb ta’ dan il-blogg), il-Gawgaw u l-Imlejka t-2ni strixxiklu kien jinsab għal bejgħ biss mill-Earth Garden fi tmiem il-ġimgħa li għaddiet. Uffiċċjalment se jkun fil-ħwienet f’Ġunju li ġej. Imma se jkun ukoll fil-Fiera tal-Ktieb Malti kif indikajna iktar ‘l fuq.

Nixtiequ niskużaw ruħna jekk mhux dejjem inwieġbu l-kummenti tagħkom. Qegħdin nagħmlu ħilitna biex inweġbuhom kollha. Skoprejna li fis-sit tagħna, t-tweġibiet li bagħatna lura mhux dejjem waslu. Għalhekk agħdruna jekk qbiżna lil xi ħadd. Nassigurawkom li m’għamilniex dan b’xi intenzjoni. Imma ibqgħu iktbulna għax b’hekk nibqgħu inżommu kuntatt magħkom.

Iktar kummenti tagħkom:

Aw, bicca xoghol tajba hafna.Kieku kelli nbiddel xi haga hi li kont naghmlu fuq karta riciklata ghax tajjeb ghal ambjent u nahseb li tatih iktar karatru ta komik.il bqija bomba
Steve Mallia

I would like to really appluad to whom it came out with this idea. Can I ask how I can have the copies mailed to me here in Ireland as I do live here. Chris Dalli

Prosit! Ghamiltu pass ghaqli hafna li hloqtu xi haga kreattiva bil-Malti wkoll! Nammirakom ghax jien ukoll fan ta tip ta comics ( l-manga gappunizi) u nixtieq li xi darba jkolli cans nohloq xi wiehed jien. Prosit hafna! Keep it up!
Iana

Ta’ min jgħid li waqt il-festival Earth Garden, ġie jżurna wkoll il-Kap tal-Oppożizzjoni, Joseph Muscat u ferħilna għall-inizjattiva li ħadna u kkumplimentana għax-xogħol li qed nippreżentaw fl-istrixxikli. Kien propju l-isem “Komiks tas-Sikkina” li qabbdu l-kurżità biex ikellimna. Aħna tajnih kopja tal-Komiks tas-Sikkina u nittamaw li jsib il-ħin biex jaqrahom u jibqa’ jsegwina. Nittamaw ukoll li jkollna l-istess opportunità biex niltaqgħu mal-Prim Ministru Lawrence Gonzi forsi fil-fiera tal-ktieb Malti s-Sibt u l-Ħadd li ġej. Nafu li t-tnejn imħabbtin ħafna imma jiswielhom jekk jirrilassaw xi ftit bil-Komiks tas-Sikkina. Xi tgħidu? Għandu mnejn li t-tnejn jogħġobhom il-Gawgaw ;)

Kranium l-1el strixxiklu

2009-05-22T14:38:00.013+02:00

Meta tfaċċa l-Ħaddied quddiemna, ħajjarnih biex jibda xi ħaġa ma' tal-Komiks tas-Sikkina. Peress li kellu ħin kemm irid biex jiddedika għat-tpenġija, aċċetta mill-ewwel u medd għonqu għax-xogħol. L-istrixxikli tagħna jinħadmu b'mod volontarju u l-iskop ewlieni tagħna hu li nieħdu gost aħna u nagħtu pjaċir lil min jaqrahom. Il-Ħaddied għall-ewwel beda fuq it-tielet strixxiklu tal-Gawgaw u l-Imlejka imma mbagħad Bin Għisa ra li aħjar li għalissa l-Gawgaw jitpenġa mill-istess id sabiex il-qarrejja ma jitfixklux.

Allura daret fuq il-Barba Kieli biex joħroġ b'xi storja ġdida u għalkemm kellu xi waħda lesta fil-kexxun, fettillu jdawwarha u jbiddilha biex taqbel mal-istil tal-Ħaddied. Issa għal min ma jafx il-Ħaddied ngħidlulu li, dan it-tali, jtajjar in-nar minn idejh u strixxiklu wieħed jagħmlu fi tliet ġimgħat tant li lill-oħrajn iħallihom b'ilsienhom barra biex ilaħħqu miegħu fil-kitba. Imbagħad il-Barba Kieli.... dak kollox jagħmel b'pass ta' nemla.

B'hekk twieldet is-sensiela l-Għid tal-Erwieħ ibbażata fuq il-karattri mistħajla ta' żminijiet oħra. L-istorja tirrakkonta kif grupp rock bl-isem ta' KRANIUM joħroġ f'nosillejl biex idoqq f'xi każin imma huma u sejrin jinħatfu minn essri parnormali u minn hemm tisvolġi ġrajja stramba u kumplessa bejn il-forzi misterjużi ta' taħt l-art. Imma t-tliet membru tal-grupp jibqgħu friski bħal ħassa quddiem dawn l-għeġubijiet li jseħħu quddiem għajnejhom u dejjem insibuhom jiżfnu skont id-daqqa. L-isfond tal-istorja u tas-sensiela huwa l-jum famuż tat-2 ta' Novembru, jum il-mejtin kollha, imsejjaħ L-GĦID TAL-ERWIEĦ. Il-karattri tal-ispirti u tal-essri paranormali fil-ġrajja tal-KRANIUM huma kollha meħudin jew spirati mill-għajdut, is-superstizzjonijiet u l-istejjer li kienu jingħadu f'Malta fi żmien meta artna kienet ħafna isbaħ u iktar ekoloġika milli hi llum.

L-ewwel strixxiklu tas-diżavventuri tal-KRANIUM jista' jinkiseb għall-ewwel darba mill-festival ekoloġiku Earth Garden fit-23 u l-24 ta' Mejju 2009 f'Ta' Qali. Hemmhekk se jkun hemm ukoll għall-bejgħ il-GAWGAW U L-IMLEJKA it-tieni strixxiklu "f'Bufies ma jiġux nies".

Preżenza

2009-05-19T10:57:00.012+02:00

Artiklu mifrux fuq żewġ paġni fuq ILLUM tal-Ħadd li għadda.

Il-mejda tal-kafeterija li qasmet magħna l-ħolm tal-karattri tal-Gawgaw u sħabu, rat ukoll il-ġlied tal-ħsieb. Mhux ta' b'xejn issemmew il-Komiks tas-Sikkina għax sikwit id-diskors fuq il-mejda sar jaqta' daqs xafra u li kieku l-ħsieb kien tal-laħam, minnu kien inixxi d-demm. Imma kull bidu għandu l-iebes u hekk ukoll f'dawn l-istrixxikli.

Oriġinarjament il-Komiks tas-Sikkina kellhom ikunu klandestini, jiġifieri jinbigħu biss mill-idejn u mingħajr pubbliċità fil-medja. Imma r-riħ dar u llum qed naraw il-Gawgaw u l-Imlejka flimkien mal-Kranium irreklamati fuq il-Youtube, fil-gazzetti, fuq it-televiżjoni, fil-facebook u saħansitra fis-swali taċ-ċinema. Xejn ta' barra minn hawn. Għaż-żminijiet ta' llum din hija ħaġa normalissima, anzi kellna kummenti li mhix issir pubbliċità biżżejjed. Imma tajjeb li wieħed ma jarax kbir. L-iskop prinċipali hu li l-preżenza tagħna tinħass.

Aġġornament tal-lista ta' ħwienet mnejn tikseb kopja.

Agenda - Triq ir-Repubblika il-Belt
Agenda - L-Università tal-Qroqq
Velmor - Pjazza Antoine de Paule, ir-Raħal il-Ġdid
St Anne's Emporium - Triq Sant' Anna l-Furjana
Palmyra - Birkirkara
Malta Comics - 60 Triq San Duminku, Tas-Sliema
Aw Tribu! - Triq Ħaż-Żabbar, il-Fgura

Earth Garden - 23 24 ta' Mejju 2009, Ta' Qali.

M'hawnx għalina...bdejna bit-tajjeb!!!

2009-05-05T01:22:00.017+02:00

Il-Gawgaw fuq Youtube, artiklu fit-Times u s-sit li ħabbatna.

Dawn huma uħud mill-messaġġi li rċevejna s’issa fuq Il-Gawgaw u l-Imlejka (l-1el str)

PROSIT !!!KOMPLU HEKK!!!GHAX HEMM BZONN NIES BHALKOM!!!
Emmanuel

Ġejt it-tnedija u ħadt pjaċir.Il-komik il-vera qiegħed tajjeb, mill-bidu sal-aħħar.Ħe ħe :)Prosit.
Altomaltes

Din l-ahjar ahbar li rajt f'gazzetta (it-Times) f'dan l-ahhar - insomma, jumejn, tal-anqas. Niftakar sekli ilu l-komiks tas-Saghtar - Ir-Rewwixta tal-Ilsiera, Viku Mason, Il-Kaccatur... dawn taghkom harira differenti - nispera li jimlew il-vojt kbir li hawn ghal dit-tip ta' litteratografija. Ta' min tghaddu xi kopji ghal bejgh mill-Agenda tal-Univ? (xejn xejn indabbar kopja mill-qrib...!)Grazzi, u bir-risq.
JB

Nawguralkom success f'dan il-progett gdid taghkom. Naf kemm hi difficli din il forma ta' letteratura biex taqbad f'Malta. Jien kont wiehed mill illustraturi tal- Komik u Avventura li kienu mietu fuq ommhom fil passat. mill gdid awguri.
Victor

Hello Maltese 'bullpen' (!)Prosit tassew! Jien fanatiku tal-comics u niftakar kemm kont niehu gost naqra "il-Kaccatur" u "Sajjetta". Sfortunatament issa qieghed nghix l-Amerka u qed nikkollezzjona il-Marvels t'hawn! Tahsbu li fil-futur tkunu tistghu tibghatu l-komiks taghkom barra Malta (ovvjament bi hlas!) Grazzi u keep it up!
James

Fl-ahhar!!!!!!! Instab uzu ghall-Malti f'dawn iz-zmenijiet 'moderni'!... Nawgura kull success lil awturi (Bin Għisa, Il-Barba Kieli u l-Ħaddied).
May D Vella

Ix-xitan m’għandux ħalib u jagħmel il-ġbejniet. Ried li lbiereaħ is-sit tagħna http://komikstassikkina.page.tl/ jiżviluppa xi ħsara teknika u mill-għaxra ta’ filgħodu sa nofsillejl, konna għadna nippruvaw inqiegħdu s-sit fl-ordni. Dan propju fil-jum meta deher artiklu fuq it-Times u s-sit tagħna rreġistra mal-245 viżitatur f’24 siegħa (aħna stennejna ħafna inqas). Niskużaw ruħna jekk forsi xi ħadd daħal u sab xi stampi neqsin u xi kitba mhix f’postha. Wara ħafna tisbit ta’ tastieri u xħit ta’ kompjuters mit-tieqa għal isfel, is-sit reġa’ lura għan-normal. (Naħlef li għandna s-saħta ta’ Bedud fuqna!!)

Dawk li qegħdin jistaqsu mnejn isibu jixtru Il-Gawgaw u L-Imlejka, nitolbuhom jistennew ftit ieħor sakemm l-istrixxikli jitqassmu fil-ħwienet li semmejna :
Agenda : L-Università Tal-Qroqq
Agenda : Il-Belt Valletta
St Anne's Emporium : Triq Sant'Anna, il-Furjana
Velmor : Ir-Raħal il-Ġdid
Palmyra : Birkirkara
Malta Comics & Collectibles : 60, Triq San Duminku, Tas-Sliema.

Qed nisperaw li nirranġaw ma’ xi ħwienet oħrajn li faċilment ikunu milħuqa.

Grazzi nies.

Ħajr

2009-05-01T23:11:00.008+02:00

Mela mill-bieraħ, il-Komiks tas-Sikkina bdew jiċċirkulaw fl-idejn. F’isem Bin Għisa, l-Barba Kieli u l-Ħaddied nixtiequ nirringrazzjaw lil dawk kollha li ġew għat-tnedija tal-ewwel strixxiklu. Il-preżenza ta’ dawn in-nies għamlitilna l-qalb speċjalment meta nafu li dawn irnexxielhom iterrqu mal-labirint tat-toroq industrijali fil-Marsa biex isibuna f’dak li qabel kien maħżen imwarrab wara l-fabbrika tas-sulfarini.

Grazzi kbira ukoll lil tal-MCA li pprovdew dak kollu li kellna bżonn biex intellgħu din l-attività. Ħajr mill-qalb lil dawk kollha li għenu f’din l-attività u għall-appoġġ morali tagħhom. Dawn in-nies, senza interessi, ddedikaw ħinhom u l-enerġija tagħhom sabiex il-lejla tirnexxi mill-aspett organizzattiv.

Ringrazzjament imur ukoll lil dawk l-individwi li għoġobhom ixerrdu t-tagħrif dwar it-tnedija permezz tal-posta elettronika u fl-istess ħin napprezzaw immensament l-għajnuna ta’ oħrajn li għoġobhom jqiegħdu l-filmat tal-Gawgaw fuq il-facebook jew fil-paġna tagħhom fuq il-Youtube. Grazzi ħafna lil dawn.

Fix-xhur li ġejjin se nkomplu bis-sensiela tal-Gawgaw u L-Imlejka u bil-ġrajjiet intriganti u eċitanti fid-dinja ta’ Bufies u lil hinn minnu. Irridu li dawn ir-rakkonti mpenġija jaslu f’idejkom b’mod konsistenti u se nagħmlu dak kollu li nistgħu biex dan iseħħ.

Il-komiks tas-Sikkina għad iridu jirrakkontaw ħafna u ħafna stejjer. Ma’ kull strixxiklu ġdid jinħolqu u jinkixfu iktar misteri u tikkarga iktar l-avventura. Ma’ kull strixxiklu tiżdied id-doża ta’ fantasija u jkunu skoperti iktar karattri bl-aġenda partikulari tagħhom.

Segwuna. U ma jiddispjaċikomx.

It-tnedija tal-ewwel strixxiklu

2009-04-09T18:48:00.021+02:00

Nista’ ngħidilkom li aħna tal-Komiks tas-Sikkina, ninsabu ħerqanin mhux ħażin biex naraw dan ix-xogħol tal-Gawgaw ħiereġ fil-pubbliku għall-ewwel darba. It-tqala kienet twila u ma nistgħux ma nifirħux li sa fl-aħħar l-omm waslet biex tiled.

Għadni niftakar fl-ewwel jiem ta’ xi tliet snin ilu meta l-proġett kien għadu fetu. L-iskizzi ta’ wiċċ il-Gawgaw u l-qagħdiet tiegħu u ta’ diversi karattri oħrajn, kienu suġġetti għad-diskussjoni twila u provi kontinwi sabiex jinstab id-disinn finali. Il-waiters tal-kafeterija fejn niltaqgħu kull ħmistax, drawna sew inqallbu l-karti tat-tpenġija f’idejna u nferrgħu kikkra te wara oħra. Matul dan iż-żmien kollu, l-Gawgaw u xrieku, saru parti minn ħajjitna u 'l quddiem nittamaw li jsiru parti minn tagħkom ukoll.

Qegħdin fl-aħħar ftit jiem ta’ qabel it-tnedija. Is-sensiela IL-GAWGAW U L-IMLEJKA, toħroġ għall-bejgħ bl-ewwel strixxiklu f’pubblikazzjoni modesta ħafna imma attrajenti, pprintjata bl-iswed u abjad, qies A5 u b’44 paġna. Is-sensiela fiha ħames strixxikli li se joħorġu bejn wieħed u ieħor, kull xahrejn. Qed nittamaw li s-sensiela tal-Gawgaw u l-Imlejka tilħaq ċerti qarrejja reflessivi u selettivi.

It-tnedija se ssir nhar il-Ħamis 30 ta’ April 2009 fit-8.00 ta’ filgħaxija, fis-sala tal-Malta Contemporary Art (MCA) il-Marsa. Ħajr mill-qalb lil Mark Mangion li pprovdielna l-post u t-tagħmir għall-okkażjoni.

Hemmhekk IL-GAWGAW U L-IMLEJKA (l-ewwel strixxiklu) se jkun għall-bejgħ bil-prezz ta’ żewġ ewro.

Issibu tixtruh mill-ħanut tal-Agenda fl-Università Tal-Qroqq, mingħand l-Agenda tal-Belt, mill-ħanut St. Anne's Emporium ta' Triq Sant'Anna, l-Furjana, mingħand Palmyra ta' Birkirkara jew mill-Malta Comics & Collectibles, 60, Triq San Duminku, Tas-Sliema.

MERĦBA

2008-09-17T22:49:00.005+02:00

Il-KOMIKS TAS-SIKKINA għandhom ikunu f’idejk dalwaqt, jaħarqu bħall-pastizzi u friski fl-ideat. Dawn għandhom jinżlu għasel lil dawk li qed ifittxu xi ħaġa ġdida fil-ġeneru tal-fantasija. Il-persunaġġi magħżula fl-istejjer huma misluta mir-rakkonti mistħajla ta' dari iżda b'laqta moderna.

Tliet snin ilu, fuq mejda waqt belgħa kafè, Bin Għisa u l-Barba Kieli, daru għas-suġġett tal-persunaġġi Maltin fl-istejjer mistħajla u l-leġġendi. Minn hemm baqgħu jikkorrispondu u jqallbu l-kotba u bdew jaqilgħu ħemel ta’ karattri u persunaġġi li jbaqbqu bil-fantasija. Hekk twieldet l-idea tal-istrixxikli bil-ġrajja tal-GAWGAW. Minkejja li llum għall-ġenerazzjoni li tielgħa issa, dawn il-persunaġġi huma kważi għal kollox minsijin, il-polz tar-rakkont tagħhom għadu jħabbat bil-ġrajja ta’ din l-art u bħal donnhom iridu joħorġu jtiru mill-qabar li tfajnihom fih.

Min hu L-GAWGAW, L-IMLEJKA, BEDUD, L-ORS TAL-GANDLORA, IT-TORK TAT-TARAĠ, min huma L-GĦEWIEL, L-UĦUX, L-GĦEFIERET, IX-XJAFEK, min hu IBLIS, IL-ĦARES, IL-ĦAJBU, IS-SAĦĦAR FALZUN u ħafna u ħafna oħrajn?

B’libsa moderna u bi stil faqgħa, Bin Għisa u l-Barba jirrakkontaw il-ġrajjiet tal-GAWGAW, raġel li trid seba’ għajnejn biex tħares lejh. Dan il-Gawgaw huwa raġel midbul, jiġifieri fih daħal GĦUL u għalhekk għandu l-poteri li jkellem L-EĦIRSA u jara u jifhem it-taħrik tan-natura u ta’ madwaru. L-elementi tan-natura li huma bħal allat li jmexxu d-dinja, jissieħbu mal-Gawgaw u mal-MIBDULIN kollha bħalu biex igerrxu L-GĦEFIERET u jwassluh sa fejn L-IMLEJKA, mara jew aħjar alla, li tarmi l-ġmiel.

L-avventura tibda f’April li ġej fuq l-ewwel strixxiklu bl-isem ta’ FIL-GARIGORI TA’ MOĦĦI jew JISBAĦ UKOLL MINGĦAJR SERDUK.